(ඔසී රටේ හිඳ සිංහල කවි ලිවීමට ඔබට සරසවි බැලූම් ලැබේවා! -- ශ්‍රී ලංකාවේ වෙසෙන මිතුරකු එවූ පැතුමක්)
මහළුව යන හදවතකට
ඔබේ පැතුම මහ ඔසුවකි
එහෙත් හදේ සැකයක් ඇත
සරසවි වරමක් ලබන්ට!
එතෙර නුහුරු රටක සිටින
කවි ලියන්න විරිය දරන
බසක් නොමැති කවියකු හට
වේ ද ලැබෙන සරසවි නෙත?
ලැබුණත් මට වාසනාව
සරසවි බැල්මක් ලබන්න
නොලැබෙනු ඇත සරසවියට
ජය භූමිය වෙත එන්නට!
එන්නට මේ ජය බිම වෙත
වීසා ලබා ගත යුතු ම ය
තිබිය යුතු ය සුදුසුකම් ද
වීසා ලබා ගන්න ඇයට
ආවොත් ඇය පර්ත් ගමට
බෝට්ටුවක නැග හෙට දින
ශාන්තිකර දූපත් මැද
කඳවුරකට ගෙන යනු ඇත!
ඇය ව මුදා හරිනු පිණිස
කරන සටනෙ ජය නොදනිමි
එබැවින් මම ලියනෙමි කවි
අනෙක් ඔසී කවියන් ලෙස (1)
(1) මේ කවිය ලියූවේ ජෝන් හාවඞ් අගමැතිව සිටි සමයේ දී ය. නව ඔස්ටේ‍්‍රලියානු අගමැති කෙවින් රඞ් යටතේ පිහිට වූ කම්කරු ආංඩුවේ ප‍්‍රතිපත්ති අනුව සරණාගත පුද්ගලයන් ෆැසිෆික් සාගරයේ කඳවුරුවලට යෑම නැවැත්වීමට ප‍්‍රතිපත්ති සම්පාදනයක් සිදු වි ය.
Subscribe to:
Post Comments (Atom)
No comments:
Post a Comment